हलबी कविता -श्रीमती देशवती कौशिक

रूख बलसे

हे माने तुमी मके नी गोंधा, रूख बलसे
तुमी गोंधासित मचो, जीव करलसे
तुमचोय असन मचो लगे, बले जीव आसे
तुमचो टयेंगा धरून, एतो के दुखन मय डरेंसे
हे माने! तुमी कसन भूलकासित
मय आंसे तेबे तुचो जीव आयसे,
तुम गोंधासित मचो, जीव करलसे
मके नी गोंधा मय, तुमचो पांय पड़ेंसे
अबे गोंधासित पाछे तुमी च पसतावासे
सुरता करा थकुन एवुन, मचो छांयें ने बसासित
थकलासित बलून मय, तुमके लेहरा दयेंसे
तुमी…गोंधासित… मचो
मय तुमके, पान फूल फर दयेंसे
तेबले बले तुमी मचो, बयरी होलासित
आपलो लालच काजे, मके गोंधासित
हे माने मके नी गोंधा ,तुमके लेहरा पानी दयेंसे
तुमी.. गोंधासित.. मचो..जीव करलसे

कविता 

नवा साल चो नवा गुहार
नवा साल चो सबके जुहार।।
जुना साल चो गोठ के गुनन।
सियान सजन चो बाट के धरून
देश चो बाड़ती चो उवाट करूं।
इया किरिया खाऊं बनाऊ तिहार
नवा साल चो नवा गुहार ।
नवा साल चो सबके जुहार।।
जिगजाग जिगजाग बिजली बरे।
ढायडूंस गुलाय फटका फूटे।।
नोट के संगाऊं बचाऊं चिल्हर।
नवा साल चो नवा गुहार ।
नवा साल चो सबके जुहार।।
मंद लंदा चो धार बोहसे।
काम बुता चो थुतुरथुमा।।
मसागत काजे करूं बिचार।
नवा साल चो नवा गुहार।
नवा साल चो सबके जुहार।।
खाते पिवतो निहाय गोचर
बरन बरन चो होयसे बिमार।
गोबर खत ने होयदे सुधार ।
नवा साल चो नवा गुहार ।।
नवा साल चो सबके जुहार।।
पढ़ाई लिखई चो मुर के धरूं
गियान धियान चो गोठ के धरूं
तेबे चुटुम रूटुम हेय दे घर दुआर।
नवा साल चो नवा गुहार ।
नवा साल चो सबके जुहार।।

देशवती कौशिक

व्याख्याता (हिंदी)
मसोरा, कोण्डागांव
मो-8962688702